الجمعة، 30 يوليو 2010
الخميس، 29 يوليو 2010
جمهورية انتيكه الشعبيه المهلبيه
يا سلام عليك يا صبحي يا فنان
قولتها من 15 سنه و الناس سقفتلك و ميعرفوش ان ده هيبقي حالنا دلوقت
بقينا عايشين في المهلبيه
مفيش حاجه في البلد صح
مفيش نظام في اي حاجه
كله عايش لنفسه
اي مسؤول بيمسك اي مكان في البلد بيبقي كل همه انه يكوش و يجري
لانه ببساطه عارف انه لو اشتغل صح الحكومه هتشيلوا
تقول لي ليه اقولك معرفش
هو الصح دلوقت ان ميبقاش حاجه صح ؟؟؟ احتمال و الله
اي دوله محترمه في العالم ( طبعا مش احنا ) الشرطه و الحكومه في خدمة الشعب
ناس عاديين جدا زيهم زي الشعب
الي غلط فيهم بيتحاسب
و حسابه بيبقي اكبر من الشخص العادي لانه مسؤول عن ناس و مينفعش انه يظلمهم او ياكل حقهم
انما احنا الحمد لله مختلفين في كل حاجه
هما عندهم الي بيغلط بيتحاسب
احنا عندنا الي بيغلط بيتكافئ
احمد بيه عز حرامي الحديد راحوا معينينوا في الحزب الوطني و بقي مسؤول كبير
المغربي بتاع الاسكان حطوه في الوزاره عشان ينهب رسمي و بمزاج
رشيد بتاع الصناعه دخلوه الوزاره برده عشان ياخد راحته و اهو كله بحسابه
و غيرهم و غيرهم و غيرهم
كل دول و في غيرهم كتييييييير بينهبوا في البلد و محدش بيقولهم بتعملوا ايه
طب ذنب الناس الغلابه الي مش لاقيه حتي رغيف العيش ايه ؟؟؟
يعني ايه يبقي واحد مرتبه 150 جنيه ؟؟؟ هياكل ولا هيشرب ولا هيركب موصلات ولا هيعلم عياله ولا ولا ولا !!!!!!
بقينا بنحس ان الناس مش طايقه بعض من الظروف الصعبه الي عايشين فيها
الشوارع ضلمه
المواصلات زحمه
اللحمه غاليه
الفراخ بايظه
الطرق كلها زباله
الغباء بقي منتشر اوي
تحس ان الناس بقوا بيتعمدوا يبقوا اغبيه عشان يعرفوا يعيشوا او ينسوا الي عايشينه
الحكومه عايزه من الناس ايه
عايزينا فيها ولا مع اول فرصه نسيبها و نمشي ؟؟ ( ده لو لقينا من الاساس فرصه )
ولا عشان اعيش في البلد لازم ابقي حرامي
يا جدعان فهمونا نعمل ايه
انا نفسي في مسؤول محترم يطلع يقولي هما بيفكروا ازاي ؟؟
مبقاش لينا كرامه في بلدنا
و اليومين دول كمان مبقاش لينا كرامه بره البلد
كل كام يوم واحد يتقتل في دوله عربيه او اوروبيه
و الحمد لله الحكومه مش مأثره
الي يتقتل بره الحكومه تروح قاتله زيه جوه
طبعا ... مش لازم يبقي في عدل امال الاجانب ياكلو وشنا يعني ....
نفسي ادخل اسم شرطه اخد حقي
نفسي الظابط يعاملني علي اني بني ادم
نفسي اسمع كلمة اتفضل جوه القسم
نفسي لما اقف في لجنه ظابط المرور يعاملني زي محمد بيه المسؤول الكبير الي لسه معدي من جنبي و قاله اتفضل يا بيه ...
نفسي لما اروح مصلحه حكوميه ميتعمليش تمرين السلالم الي كرهني في سلالم بيتنا
طب انا راجل رايح اعمل بطاقه ... ايه ذنبي انا تمشورني علي المكاتب و ده يقولي هنا و ده يقولي هنا و ده يقولي هنا
و سبحان الله ارجع لاول واحد و برده هو الي يعملي الحاجه الي انا عايزها !!!!!!!!!
نفسي لما ادخل ماتش الامن يعاملني كويس و ميقلعنيش الجزمه و البنطلون ....
طب الجزمه و قولنا ماشي انما البنطلون لييييييييييييه ؟؟ مش حمام هو يا بيه ...
نفسي حاجه في البلد ترخص ( بغض النظر عن البني ادم الي مبقاش ليه قيمه من الاساس )
حجات كتير في البلد غلط
يا تري هتتصلح امتي و ازاي !!!!!!!!!!!!!
و اخيرا و ليس اخرا
نفسي انجح ................
اسماعيليه .. جمهوريه .. برازيل الكوره المصريه
هنعيش ونقول.. دراويش على طول.. ولا حد هيقدر يمنعنا.
اوليه اوليه .. اوليه اوليه .. اوليه اوليه اوليه
الدراويش هو حياتي .. افديه لحد مماتي
هنقول دراويش علي طول ... مهما العمر يطول
اووووووه اووووووووه اووووووووووه
اووووه اووووه اسماعيليه دايما عاليه
اووووه اووووه جينا عشانك يا غاليه
الاشتراك في:
الرسائل (Atom)